मनोज गुप्ता //वीरगञ्ज, बैशाख ३१//
चालू आर्थिक वर्षको बैशाख ३० गते सम्म सरकारी वित्त करिब २ खर्ब घाटामा रहेको महालेखा नियन्त्रण कार्यालयले जनाएको छ ।
देशको अर्थतन्त्रको शिथिलताको प्रभाव सरकारी वित्तमा देखिएको छ । लक्ष्यअनुसार राजश्व संकलन हुन नसक्दा सरकारी वित्तमा यस्तो प्रभाव परेको हो ।
आर्थिक गतिविधि सुस्त हुँदा सरकारले लक्ष्य अनुसार राजश्व संकलन गर्न नसकेको जनाईएको छ । त्यस्तै वैदेशिक सहायता तथा अनुदान घटेका कारणले समेत सरकारी आम्दानीको स्रोत घटेको छ ।
सरकारले प्राप्त गर्ने राजश्वका स्रोतहरु घटेको तथा कर्मचारीहरुको तलब, भत्ता, पेन्सन, सामाजिक सुरक्षा भत्ता लगायतका अनिवार्य दायित्वहरु दिनप्रतिदिन बढ्दै गएकोले पनि सरकारी वित्तमा घाटा बढ्दै गएको हो ।
हुन त सरकार सम्बद्ध दलहरुले देशको आर्थिक अवस्थामा यथोचित सुधार हुने दाबी बेला बेलामा नगरेका होइनन् तर हालसम्म व्यवहारमा त्यस्तो सुधार देखिएको छैन ।
