भोला यादव// रौतहट // कार्तिक १२ गते,
रौतहटको फतुवा बिजयपुर नगरपालिकाका कार्यवाहक मेयर अम्बेया खातूनको जिद्धको कारण पालिका अस्त व्यस्त बनेका छ । कार्यवाहक मेयर खातुनले आफ्नो अनुकूलका हाकीम सुरेन्द्र प्रधानलाई नै प्रमुख प्रसाशकीय अधिकृतको रुपमा हाजिर गराउन खोज्दा नगरपालिका अस्त व्यस्त बनेका हो ।
रौतहटको उतरी भेगमा रहेको फतुवा बिजयपुर नगरपालिकामा सुरेन्द्र प्रधान यस अघि पनि कार्यभार सम्भालि सकेको र आफ्नो कार्यकालमा चरम भ्रष्टाचार गरेका कारण प्रधान हाकिमको रुपमा हाजिर हुदा पालिकामा पुनः ब्रह्मलूट मचाउने भन्दै वडा नं १ देखी वडा नं ११ सम्मका वडाअध्यक्ष लगायत कार्यपालिका सदस्यहरुले प्रधानलाई हाजिर नगराउन भन्दै बिरोध गरेका छन ।
हिन्दुहरुको महान पर्व दीपावली तथा लोक आस्थाको पर्व छठ पर्वको शुभ अवसरमा वडाअध्यक्ष लगायत कार्यपालिका सदस्यहरु एका तर्फ र कार्यवाहक मेयर खातुन एकलै अर्को तर्फ रहेर विवादित बनाएका पालिकामा कार्यरत कर्मचारिहरुले तलब भत्ता न पाउदा केहि दिन अगाडी पालिकामा ताल्चा समेत लगाएका थिए ।
जन निर्वाचित मेयर निलंबन भएको मौकाको फाईदा उठाउन कार्यवाहक मेयर आफ्नो अनुकूलको हाकीम हाजिर गराई मनोमानी गर्न खोजिरहेको कार्यपालिका सदस्यहरुले आरोप लगाएका छन । कार्यवाहक मेयरका कारण लथालिङग बनेका पालिकाका कर्मचारीको तलव, वृद्ध वृद्धाका भता, पोषण भता समेत वितरण हुन सकेको छैन । साथै आम नागरिकको दैनिक सेवा समेत प्रभावित भएको तर कार्यवाहक मेयर यस प्रति गैर जिम्मेवार देखिएको वडा अध्यक्षहरुको आरोप रहेको छ ।
नेपाल सरकारको नियम अनुसार अषाढ १० गते निति तथा बजेट कार्यक्रम ल्याउने व्यवस्था रहे पनि अहिले सम्म पालिकाले नगर सभा गरी बजेट समेत प्रस्तुत गर्न सकेको छैनन । प्रत्येक महिना कार्यपालिकाको बैठक बस्ने नियम हुदाहुदै पनि लगभग २ र ३ महिना देखि एउटा पनि बैठक नबसेको र निमित्त प्रमुख प्रशासकीय अधिकृतले सूचना गर्दा आफु अर्को सूचना गरेर स्थगित गर्ने गरेको कार्यपालिका सदस्यहरुले आरोप लगाएका छन ।
उता कार्यवाहक मेयर खातुन कुनै हालतमा प्रधान बाहेकको अर्को हाकिमलाई हाजिर नगराउने अडान राखेकि छन् ।
