वीरगञ्ज, श्रावण ७
आज श्रावण महिनाको ७ गते श्रावण कृष्ण प्रतिपदा अर्थात यस वर्षको श्रावणको पहिलो सोमबार मध्यतराइको पर्सा, बारा, रौतहट लगायत नेपाल तथा छिमेकी मुलुक भारतका सम्पूर्ण शिवालयहरुमा भक्तजनको व्यापक घुइँचो देखिएको छ ।
हरेक वर्षको श्रावण महिनाभरी हिन्दु धर्मावलम्बीहरुको प्रमुख देवताहरु मध्येको एक महादेव ( शिव) को मन्दिरमा गइ शिवलिङ्गमा जल अर्पण गर्दा महादेव प्रसन्न हुने तथा आफ्नो मनोकामना पूरा हुने जन विश्वास रहेको छ ।
शिव भक्तहरुको लागि श्रावण महिनामाको विशेष महत्व हुने भएको र श्रावण मासको सोमबार शिव पूजनको लागि अझै महत्त्वपूर्ण मानिने भएकोले आज पर्सा जिल्लाको महत्वपूर्ण शिवालयको रूपमा प्रसिद्ध भाठ्ठाको दुधेश्वर नाथ महादेवको मन्दिरमा हिजै बेलुकी देखि भक्तजनको ठूलो घुइँचो लागेको थियो ।
पर्साको सुगौली पटेर्वा गाउँपालिका अन्तर्गत रामभौरी भाठ्ठा स्थित दुधेश्वर नाथ महादेवको पुजा, अनुष्ठान र जल अर्पण गर्ने उदेश्यका साथ हिजो दिउँसो देखि नै श्राद्धालुहरुको आगमनमा वृद्धि हुँदै आज बिहान सम्म हजारौंको सन्ख्यामा श्राद्धालुहरुको भिड लागेको थियो ।
नेपाल र भारतका विभिन्न प्रदेश बाट आउने गरेका भक्तजनको आवतजावत लाई सहज पार्न पर्सा राष्ट्रिय निकुञ्जले श्रावण ५ गते देखि नै दैनिक १२ घण्टाका लागि भाठ्ठा रुटको बाटो समेत खोल्ने गरेको छ ।
साथै श्रावणको पहिलो सोमबार आज वीरगञ्जको अलखिया मठ, पशुपतिनाथ मन्दिर, सहजनाथ बाबा मन्दिर, बारा जिल्ला स्थित सिद्धेश्वर मन्दिर, भारतको अरेराज स्थित सोमेश्वर नाथ मन्दिर लगायतका शिवालयहरुमा भक्तजनहरुको ठूलो घुइँचो देखिएको छ ।
